Aktorja e njohur turke Sıla Türkoğlu është rikthyer sërish në qendër të vëmendjes së mediave, këtë herë për shkak të thashethemeve që lidhen me serialin e ri DOC, ku ajo pritet të ketë një rol të rëndësishëm.
Së fundmi, Sıla Türkoğlu u filmua nga gazetarët në aeroport, së bashku me të fejuarin e saj, Atom Ayyildiz. Gjatë këtij momenti, ajo u pyet drejtpërdrejt për zërat që qarkullojnë në media, sipas të cilëve aktorja Alina Boz është përjashtuar nga seriali DOC për t’i lënë vendin asaj.
Duke reaguar qartë dhe pa hezitim, Sıla Türkoğlu i mohoi kategorikisht këto pretendime, duke theksuar se situata nuk ka asnjë lidhje personale me të:
“Ata nuk arritën një marrëveshje. Kur nuk u dakordësuan, erdhën tek unë. Kjo temë nuk ka absolutisht asnjë lidhje me mua. Alina është kolegia ime, një aktore që e dua dhe e respektoj.”
Me këtë deklaratë, aktorja vendosi pikën mbi “i” ndaj spekulimeve që kanë qarkulluar ditët e fundit në mediat turke dhe rrjetet sociale. Ajo theksoi se ndryshimet në kastin e projektit janë rezultat i marrëveshjeve profesionale, dhe jo konflikteve personale apo rivaliteteve mes aktoreve.
Deklarata e Sıla Türkoğlu u prit pozitivisht nga fansat, të cilët e vlerësuan qasjen e saj të qetë dhe respektuese ndaj koleges së saj, duke treguar edhe një herë profesionalizmin e saj në industrinë e serialeve turke.
